قواعد المرور في مصر !!

قواعد المرور في مصر !!
اتبعتلي ايميل عن المرور في بلدنا العزيز و عايزه اخد رأيكو في الموضوع




قواعد قياده السيارات في مصـــــــــــــــــــــــــــــــــــــــــــــــر ::


اول قاعده :

لو عربيتك قديمه او كبيره استخدم المبدأ القانوني :
اللي خايف على عربيتو يوسع !!!


ملحوظه :

ابعد عن سكه العربيات المخرشمه .. بيسوقو بنظريه ضربو الاعور على عينو !!


تاني قاعده :
قاعده البوز بير :

اللي يدخل بوز عربيتو الاول للتقاطع هو صاحب اولويه المرور
احرص على ان تكون صاحب اول بوز


ملحوظه :

لا نتطبق قاعد البوز على مع اي لوري او اتوبيس حرصا على بوزك لا مؤاخزه


تالت قاعده :

الاشارات تكشف نواياك للاعداء
اياك ان تستخدمها

رابع قاعده :

لا تترك مسافه بينك و بين السياره التي امامك فهذا له عده مخاطر :

1 - عربيه تانيه هتملا الفراغ في ثواني
2 - هتدي فرص للعيال يعملو غرز قدامك
3 - كل الماشيين هيغمضو عنيهم و يعدو من الحته دي
4 - اللي وراك هيقعد يزمر - لو كان مؤدب - او هتسمع شويه اسامي حيوانات من اللي قلبك يحبها - لو كان سواق تاكسي مؤدب - او هيخبطك من ورا لو كان سواق ميكروباص - ودول ما فيش منهم حد مؤدب -

خامس قاعد :

الاشارات مش معموله عشان تنظم المرور معموله عشان شكل القاهره يبقى متحضر بس !!
اعتمد على العساكر ( مع تحمل كامل المسؤوليه لو واحد شاورلك تعدي و بلدياته من الناحيه التانيه قتح السكه ) او يفضل ان تستعمل قاعده البوز بير ( راجع القاعده التانيه )

سادس قاعده :

ازا كنت مش واقف ف الصف الاول ف الاشاره اعمل حسابك تزمر بشكل متواصل و هستيري اول ما تفتح الاشار لان الناس اللي قدام بيبقوا واقفين ف الاشاره من زماااااااااااااااااااان و جايز جدا يكونو ناموا !!

سابع قاعده :

معظم الحوادث تحدث ف التقاطعات اول ما الاشاره ما تحمر كل ما عديت الاشاره الحمره اسرع كل ما قلت فرصه انك تتخبط !

تامن قاعده :

الشارع مكان مقرف سوق باسرع ما يمكن عشان تتخلص من الهم ده بسرعه الناس الي ماشيين بالراحه مرضى نفسيين بيستمتعو بالعذاب
يستهلو اللي يجرالهم مش كده بردو ؟!

تاسع قاعده :

من حقوقك الدستوريه ان تركن امام باب المحل الذي تريد ان تشتري منه اذا سبقك واحد ابن ستين في سبعين و ركن قدام البابا فمن حقك تقفل عليه و تركن صف تاني او تالت و مش مهم لو الشارع اتقفل ايه يعني لما النس تتعطل 10 دقايق عشان تستمتع بحقوقك الدستوريه ؟
هي يعني الدنيا طارت و لا كان وراهم الديوان ؟

عاشر قاعده :

من حقك ان تخرج محل انتظارك في اي وقت تشاء اكسر الدركسيون شمال و اطلع اي حد ماشي ف الشارع لازم يقف لك فورا ( راجع البند السابق )

القاعده الحاديه عشر :

احترس من ثلاثه انواع من السواقين بيسوقو و كأنهم مش ممكن يموتو :
1 - العيال الروشين اللي بيلعبوا computer games فاكرين ان ممكن يكسبو ال life زياده لو ساقو اسرع
2 - موتيسكلات توصيل الطلبات
3 - سواقين الميكروباص

ملحوظه :

اوعى تحاول تثبت لحد منهم ان فكرته غلط .. فاهمني !!!

القاعده الثانيه عشر :

لما تشوف حادثه لازم تهدي و تتفرج - مش مهم تساعد - الحجات دي دمها اخف من اخبار التلفيزيون الممله و بعدين لما الطريق وراك يقف تحمي المجتمع من حادثه تانيه !

القاعده الثالثه عشر :

الكناسين لازم يحللو اللقمه اللي بياكلوها
حاول تنفعهم و ترمي اي حاجه من الشباك

القاعده الرابعه عشر :

لما تخلص السيجاره اوعى تحطها ف الطفايه ارميها من الشباك اول ما تشوف واحد بموتوسيكل معدي جمبك عشان يحرم يعمل غرز

القاعده الخامسه عشر :

من حقك ان تعبر الشارع من اي مكان و في اي وقت

القاعده السادسه عشر :

اذا كان هناك سياره قادمه اعمل نفسك مش واخ بالك و عدي براحتك خالص هو هيقف
هو اهبل يودي نفسو في داهيه ؟

القاعده السابعه عشر :

اياك ان تنظر نحو السياره القادمه اعبر الطريق وظهرك لها حتى لا يشك احد السائقين انك تراه و يحاول يخوفك عشان تقف

القاعده الثامنه عشر :

حتى لو شفتو اوهى تخاف بالذات لو معاك بنت تبقى راجل ملو هدومك و تخاف من حته عربيه ؟!!
طنش و سيبو يتفلق

القاعده التاسعه عشر :

الرصيف ليس للمشاه بل لركن السيارات و فرشات الباعه لذلك يحق للمشاه السير و سط الشارع ( لمزيد من الامان راجع القاعده السابقه )

القاعده العشرين :

اذا كان الماشي من فئه النقل الثقيل فمن ابسط حقوقه انو يمشي على اقل من مهله و يهتز براحته و اللي مش عاجبه الهز يدور على لوري يخبطو




خلصنا القواعد
بس امشو عليها امانه عليكو


واخيرا على رأي اللي قالو ( يبقى انت اكيد .. اكيد في ف مصر